مسته‌فا شڵماشی
به‌پێی ڕاگه‌یه‌نراوی ڕۆژی ٦/٤/٢٠٠٧ ی کۆ میسیۆنی ڕاگه‌یاندنی حیزبی دێموکڕاتی کوردستان و ڕاگه‌یاندنی٧/٤/٢٠٠٧ ی سکرتاریای حیزبی دێمو کڕاتی کوردستانی ئێران، سه‌رۆکایه‌تی هه‌رێم ڕۆژی ٣/٤/٢٠٠٧ له ‌هاوینه‌هه‌واری سه‌لاحه‌دین، کۆبونه‌وه‌یه‌کی هاوبه‌شی له‌گه‌ڵ به‌ڕێزان مامۆستا عه‌بدوڵڵا حه‌سه‌نزاده‌ و کاک مسته‌فا هیجری پێک هێناوه ‌و داوای لێکردوون یه‌ک بگرنه‌وه ‌و له ‌چوارچێوه‌ی یه‌ک حیزبدا پێکه‌وه‌کار بکه‌ن.

جێگای خۆیه‌تی ده‌ستخۆشی له‌ سه‌رۆکی هه‌رێم به‌رێز کاک مه‌سعود بارزانی بکرێ بۆ ئه‌و هه‌وڵه‌ دلسۆزانه‌یه‌ی و له ‌لایه‌ن هه‌موو ئه‌و که‌سانه‌وه‌ که ‌ده‌توانن نه‌خشیان هه‌بێ له‌ وه‌دیهێنانی داوای به‌ڕێزیان دا، پشتیوانی له‌و هه‌نگاوه‌ پیرۆزه‌ بکرێ، چونکه ‌گومان له‌وه‌دا نییه‌که ‌یه‌کگرتنه‌وه‌ی هه‌ردوو باڵه‌که‌ی حیزبی دێموکڕات، به‌ قازانجی هه‌موو گه‌لی کورده ‌به‌گشتی و به‌قازانجی گه‌لی کورد له‌ ڕۆژهه‌ڵاتی کوردستانه‌ به‌تایبه‌تی.  با هه‌ردوو باڵی حیزبی دێموکڕاتیش به‌خاتری قازانجی گشتی گه‌لی کورد ده‌ست له ‌یه‌کتر تاوانبار کردن هه‌ڵگرن و له ‌بیری وه‌رگرتنی ده‌ستکه‌وتی جیناحیدا نه‌بن. چونکه‌ گومان له‌وه‌دا نییه ‌که‌دووبه‌ره‌کی به ‌زیانی گه‌لی کورد و به زیانی هه‌ردووک جیناحیشه‌ و یه‌کگرتن بۆ هه‌موو لایه‌نه‌کان به‌قازانجه‌. بێگومان ده‌بێ هه‌ردووک لا ده‌ست له‌ هێندێک داوا و بۆچوونی جیناحی هه‌ڵگرن و هه‌ردووک لاش قه‌بو ڵ که‌ن که‌حیزبی دێموکڕاتی کوردستان پێویستی به‌ڕیفۆرم هه‌یه‌. ده‌بێ تواناکان وه‌گه‌ڕ بخرێن و له‌هه‌موو ئیمکاناتی ماددی و مه‌عنه‌وی حیزب که‌ڵک وه‌رگیرێ تا ئه‌و حیزبه‌ بتوانێ وه‌ڵامده‌ری ئه‌و ئه‌رکه‌ مێژووییه ‌بێ که‌ که‌وتوه‌ته‌ سه‌ر شانی.

دیاره‌ میکانیزمه‌کانی یه‌کگرتنه‌وه ‌و ڕیشه‌کێش کردنی ناکۆکییه‌کان شتێک نین که ‌له ‌بواری نوسینێکدا و له‌ لایه‌ن ته‌نیا که‌سێکه‌وه‌ بتوانرێ دیاری بکرێن. ئه‌وه‌ هێندێک مه‌سه‌له‌ی گرنگن که‌ ڕه‌نگه ‌باشترین ڕێگا بۆ دیاری کردن و ده‌سته‌به‌ر کردنی ئه‌وانه‌ پێکهێنانی کۆمیته‌یه‌ک له ‌که‌سایه‌تی زانا و دڵسۆز له‌ هه‌ردووک لاو به ‌به‌شداری نوێنه‌ری سه‌رۆکی هه‌رێم له‌و کومیته‌یه‌دا بتوانرێ وه‌دی بێن.

به‌ڵام ده‌توانین ئاماژه‌ به ‌هێندێک هه‌ڵوێست بکه‌ین که ‌به‌بێ گوڕینی ئه‌و هه‌ڵوێستانه، باس کردن له‌ یه‌کگرتنه‌وه ‌زۆر دژوار ده‌بێ. بۆ وێنه‌ لایه‌نی زۆرینه‌ی کومیته‌ی ناوه‌ندی کۆنگره‌ی سێزده‌ ده‌بێ ده‌ست له‌وه‌ هه‌ڵگرێ که ‌"کۆمه‌ڵێک کادر و پێشمه‌رگ له‌حیزب ڕۆیشتون" و ده‌توانن بگه‌ڕێنه‌وه‌. دووباره ‌کردنه‌وه‌ی ئه‌م بۆچوونه ‌به ‌واتای دژایه‌تی له‌گه‌ڵ یه‌کگرتنه‌وه‌یه ‌و هه‌روه‌ها ئه‌وه‌ش ده‌سه‌لمێنێ که ‌تا ئێستاش ئه‌و هاوڕێیانه‌ دان به‌گیر و گرفته‌کاندا ناهێنن و هه‌ر به‌مجۆره‌ش ئاماده‌ نین چاره‌سه‌ریان بکه‌ن. چونکه ‌له‌و ماوه‌یه‌دا بۆ هه‌موو که‌س سه‌لماوه ‌که ‌ئه‌وه‌ کۆمه‌ڵێک کادر و پێشمه‌رگه ‌نین که‌ڕۆیشتون، به‌ڵکو حیزبی دێموکڕات بووه به‌دوو به‌ش، هه‌ر کامیان له‌و ماوه‌یه‌دا بۆ خۆده‌رخستن و مه‌شروعییه‌ت به‌خۆ دان له حیزبه ‌گه‌وره‌که‌ی پێش له‌تبوون چالاکیان زۆرتر بووه‌.

هه‌ر وه‌ک پێویسته‌ باڵه‌که‌ی دیکه‌ش هیچیتر به‌و خاڵانه‌وه‌ نه‌نوسێ که‌پێش لێکدابڕانی حیزب داوای ده‌کردن و ئێستا گرنگ ئه‌وه‌یه‌ که ‌یه‌کگرتنه‌وه، ڕیفۆڕم و که‌ڵک وه‌ر گرتن له هه‌موو تواناکان له ‌لایه‌ن هه‌ر دووک لاوه‌ قه‌بوڵ بکرێ. به ‌پێویستی ده‌زانم هه‌ر له‌م په‌یوه‌ندییه‌دا ئیشاره‌ به‌ هه‌وڵێکی دڵسۆزانه‌ی کاک بابا عه‌لی میهرپه‌روه‌ر بکه‌م که ‌له ‌بانگه‌وازێکدا ڕایگه‌یاندووه‌. به‌ڕاستی خاڵی جوانی تێدایه‌ که پێویسته ‌سه‌رنجیان بدرێتێ. جگه ‌له‌وه‌ش پێشنیارم بۆ کاک بابا عه‌لی ئه‌وه‌یه ‌که ‌هه‌وڵه‌کان چڕتر بکاته‌وه ‌و له‌گه‌ڵ چه‌ند که‌سایه‌تییه‌کی دیکه‌ی بنه‌ماڵه‌ی دێموکڕات هه‌وڵ بده‌ن ئه‌و هه‌نگاوه‌ی سه‌رۆکایه‌تی هه‌رێم ناویه‌تی ڕانه‌وه‌ستێ و به‌ پێکهێنانی زه‌مینه له ‌نێو ڕێبه‌رایه‌تی هه‌ردووک لادا کارێک بکه‌ن ئه‌و هه‌وڵه‌ پیرۆزه‌ به ‌ئه‌نجام بگا.

بۆ داهاتوی ڕۆژهه‌ڵاتی کوردستان هه‌لێکی له‌بار هه‌ڵکه‌وتوه‌ـ ڕژیمی کۆماری ئیسلامی به ته‌واوی ئیزۆله‌ بووه ‌و له‌ژێر فشار دایه. پشتیوانی نێونه‌ته‌وه‌یی بۆ ئازادیخوازانی ئێران ڕۆژ له‌دوای ڕۆژ زۆرتر ده‌بێ و گومان له‌وه ‌دا نییه ‌که ‌به ‌یه‌کگرتنی هێزه ‌ئازادخوازه‌کانی گه‌لانی ئێران و به‌پشتیوانی کۆمه‌ڵگای نێونه‌ته‌وه‌یی، ڕژیمی کۆماری ئیسلامی به‌م زوانه ‌به‌چۆکدا دێ. به‌ڵام نابێ ئه‌وه‌مان له‌ بیر بچێ که‌ گه‌لی کورد له‌و ئاڵوگۆڕه‌ش هیچی پێنابڕێ، ئه‌گه‌ر هه‌موو هێزه‌کانی "نه‌ک ته‌نیا حیزبی دێموکڕات" سه‌ریه‌ک نه‌خاته‌وه‌ـ چونکه ‌ده‌بێ ئه‌وه‌ باش بزانین که‌ ته‌نیا هێزی خۆمان زامنی وه‌ده‌ستهێنانی ئاواته‌کانمانه و زۆر هێزیش که‌ ئێستا خۆیان وه‌ک دۆست نیشان ده‌ده‌ن، له ‌داهاتوودا ڕه‌نگه ‌له ‌کۆماری ئیسلامی زۆرتریش دژایه‌تیمان بکه‌ن.

به‌هیوای بیستنی هه‌رچی زووتری خه‌به‌ری یه‌کگرتنه‌وه‌ی ڕیزه‌کانی حیزبی دێمو کڕات و ده‌ست پێکردنی هه‌وڵی جیدی بۆ پێکهێنانی به‌ره‌ی کوردستانی له‌ ڕۆژهه‌ڵاتی کوردستان.

مسته‌فا شڵماشی
 ٨/٤/٢٠٠٧

» مێهرپه‌روه‌ر:"با حیزبی دێموکرات تێکه‌ڵ که‌ین

بانگه‌واز
ئه‌ندامان، لایه‌نگران، کادر و پێشمه‌رگه‌کانی حدکا (هه‌ردوو به‌ش)
چوار مانگ به‌ سه‌رئینشعاب له‌ ح.د.ک.ا  تی ده‌په‌رێ. له‌و نووسراوه‌دا ناچمه ‌سه‌ر ئه‌ومه‌سه‌‌له‌ که‌ ئه‌گه‌ر چ بکرایه‌ و چ نه‌کرایه ‌ده‌یتوانی به‌رگری له‌ ئینشعاب له‌ حیزبدا بکا. به‌ داخه‌وه‌ ئه‌وه‌ی که‌ نه‌ده‌بوا رووبدا، روویداوه‌. ئاسه‌واری کورتخایه‌نی ئه‌م رووداوه‌ بریتی بووه‌ له‌ لاوازبوونی هێزو تواناکان له‌ لایه‌ک و له‌ لایه‌کی دیکه‌شه‌وه‌ له‌باری سایکۆلۆژییه‌وه‌ ئاسه‌واری نێگاتیفی له‌سه‌ر خه‌ڵکی کورد به‌ گشتی و کوردی رۆژهه‌ڵاتی کوردستان به‌ تایبه‌تی  داناوه‌. ئیتر له‌وه‌ گه‌ڕێین ‌ دوژمن چه‌نده‌ خه‌ونی به‌ رۆژێکی واوه‌ ده‌دی که درز بکه‌وێته‌ ریزی بزووتنه‌وه‌ی کورد.‌

 خاڵێکی جێگای سه‌رنج و ده‌کرێ بڵێین مایه‌ی ئومێد ئه‌وه‌یه‌ که‌  هه‌ر دوولا له‌ لێدوانه‌کانیان دا شانازی به‌ رابردووی ح.د.ک.ا، درێژه‌دانی رێگای ریبه‌رانی شه‌هید (قازی، قاسملووو شه‌ره‌فکه‌ندی)، پرنسیپه‌کانی حیزب، مێژوی61 ساله‌ی حیزب و سه‌روه‌ریه‌کانی ده‌که‌ن و ئامانجه‌کان و دروشمه‌کان، هه‌مان دروشم و ستراتیژی حیزبه‌ 61 ساڵه‌که‌یه‌. هه‌ر دوولا به‌ تایبه‌ت دوای دابڕان باس له‌ چاکسازی، نوێبوونه‌وه‌ و ریفۆرم وهه‌ست به‌و  پێویستیه‌ ده‌که‌ن که‌ ده‌بێ خۆ له‌گه‌ڵ ره‌وتی پێشکه‌وتن رێکخه‌ن و بۆ وه‌دیهێنانی ئه‌م مه‌به‌سته‌ش باس له‌ گۆڕان له‌ شێوازی کارکردن، قه‌واره‌ی ته‌شکیلاتی ونوێگه‌رایی دێننه‌ گۆڕ و باس له‌وه‌ ده‌که‌ن که‌ ده‌بێ بایه‌خی جییدی بدرێ به‌ به‌شداری ژنان و لاوان له‌ پێکهاته‌ی رێکخراودا.

 پێکهاته‌ی رێبه‌رایه‌تیی ‌ هه‌ر دولا هه‌ر ئه‌وانه‌ن که‌ ساڵه‌های ساڵه‌ شان به‌ شانی یه‌کتر و له‌ ته‌نیشت یه‌کتردا‌ دژی کۆماری ئیسلامی و له‌ پێناوی وه‌دیهێنانی ئامانجه‌کانی گه‌لی کوردا خه‌باتیان ده‌که‌ن و گومانی تێدا نیه‌ شێوه‌ی بیرکرنه‌وه‌ و بۆچوونه‌کانیان له‌ سه‌ر مه‌سایل لێک نزیک و به‌ دژواری جیاوازیه‌کان ده‌رده‌که‌ون و به‌ گشتی خاڵه‌ هاوبه‌شه‌کان ئه‌وه‌نده‌ زۆرن که‌ لێک جیابوونه‌وه‌ی ته‌شکیلاتی و رێکخراوه‌ییش نه‌یتوانیوه‌  ئه‌م خاڵه‌ گرنگ و هاوبه‌شانه‌ بخاته‌ په‌راوێزه‌وه‌.

 کیشه‌کانی نێوخۆی حیزب پێش 15/9/85 زیاتر له‌وه‌ سیاسی بن، له‌ سه‌ر شێوه‌ی مودیریه‌ت، جیاوازی بۆچوون و سه‌لیقه‌ له‌ سه‌ر مسایلی ته‌شکیلاتی و مافی زۆرینه‌ و که‌مینه‌..... بوون. گه‌ڵاڵه‌کان زیاتر بۆ ئیمتیاز وه‌رگرتن و ئیمتیازدان بوون نه‌ بۆ نوێ کردنه‌وه‌ و چاکسازی و ریفۆرم.

  - له‌ ئاکامی ئه‌و رووداوه‌دا به‌شێکی زۆر له‌ ئه‌ندامانی حیزب له‌ رووی ناچاریه‌وه‌ لایه‌کیان هه‌ڵبژاردوه‌، ده‌نا خوازیاری که‌رت بوونی ئه‌م حیزبه‌ نه‌بوون. به‌ڵام له‌ لێکدانه‌وه‌ی نیهایی دا لایه‌کیان بۆ تێکۆشانی خۆیان له‌ لایه‌کی دیکه‌ پێ باشتربووه‌

 - به‌ هۆی بارودۆخی تایبه‌تی ناوچه‌ی نیشته‌جێ بوونی رێبه‌رایه‌تی و بنه‌ماڵه‌کان و ئه‌ندامانی ئاشکرای حیزب له‌ کوردستانی عێراق، هه‌ر دوو لا له‌ رووی ناچاری له‌ ته‌نیشت یه‌کتر و دراوسێی یه‌کترن، ته‌نانه‌ت شوێنی کارکردنیشیان له‌ ته‌نیشت یه‌کتره‌. ئه‌گه‌ر جیاکردنه‌وه‌یه‌کیش له‌ باری جوغرافییاییشه‌وه‌ بێته‌ پێش به‌ هۆی بارودۆخه‌ تایبه‌تییه‌که‌ و سه‌نگینی و قورسی جێ گۆرکێ و نیشته‌جێ بوون، له‌ داهاتووشدا هه‌ر له‌ نزیک یه‌کتر ده‌بن و رۆژانه‌ یه‌کتر ده‌بینن.

- هێز و نیروی هه‌ر دوولا له‌و‌ ماوه‌دا بۆ سه‌لماندنی ره‌وایی خۆیان و لاواز کردن وبه‌ هێندنه‌گرتنی لایه‌نی به‌رانبه‌ر ته‌رخان کراوه‌ و گۆمانی تێدا نیه‌ ئه‌و ململانێ یه‌ به‌م زووانه‌ کۆتایی پێ نایێ و به‌ داخه‌وه‌ ئه‌گه‌ری رووداوی تاڵ و ناخۆشیش به‌ دوور نازانرێت.

 -پێم وایه‌ مادام  له‌ باری سیاسییه‌وه‌ جیاوازییه‌کی ئه‌وتۆ له‌ به‌رنامه‌ی هه‌ردوو لادا به‌دیناکرێ، هیواکان بۆ داڕشتنه‌وه‌ی حیزب به‌ شێوه‌یه‌کی مۆدێرن خۆیان نه‌دۆڕاندوه‌.  به‌ له‌ به‌ر چاوگرتنی ئه‌و فاکتانه‌‌ له‌ سه‌ره‌وه‌ باس کران و به‌ پشت به‌ستن به‌ هاوده‌نگیی به‌رفراوانی ئه‌و دلسۆزانه‌ که‌ یه‌کپارچه‌یی حیزبی دیموکراتیان لا مه‌به‌سته‌ و دابه‌ش بوونی حیزبیان پێ خه‌سارێکی گه‌وره‌و نابه‌جێیه‌و هه‌وڵ بۆ یه‌کپارچه‌یی دووباره‌ی حیزب ده‌ده‌ن، ریزه‌ پێشنیارێک به‌ مه‌به‌ستی دارشتنه‌وه‌ی قه‌واره‌ی حیزبی دیموکراتی کوردستانی ئێران دێنمه‌ ئاراوه. ‌

الف) بنه‌ماکان

  1- له‌ کۆنگره‌یه‌کی هاوبه‌ش و به‌ به‌شداری نوێنه‌رانی هه‌موو ئه‌ندامانی حیزب و به‌ پێی میکانیزمێکی جێی په‌سه‌ندی هه‌ر دوو لا ساختارێکی نوێ بۆ حیزب دارژێته‌وه‌.

  2- بناخه‌ی ته‌شکیلاتی ئه‌و رێکخراوه‌ که‌ مه‌به‌سته‌ رێکخراوه‌یه‌کی سێهه‌م نیه‌، به‌ڵکوو رێکخراو‌یکه‌ له‌ سه‌ر بنچینه‌ی ح.د.ک.ا داده‌مه‌زرێ و ئه‌ندامه‌کانی، ئه‌ندام و لایه‌نگرانی ح.د.ک.ا پێش( 15/9 /85 )ن        

 3- مێژوو هه‌مان مێژووی 61 ساڵه‌ی حیزب و رێنوێنی تێکۆشان، ئامانجه‌کانی کۆماری کوردستان سه‌مبول و هێما رێبه‌رانی شه‌هید قازی، قاسملوو، شه‌ره‌فکه‌ندی.

  4- ئامانج و ئیستراتیژی له‌ سه‌ر بنه‌مای دیموکراسی، مافی نه‌ته‌وایه‌تی و عه‌داڵه‌تی کۆمه‌ڵایه‌تی، کۆنگره‌ دیاری ده‌کات.

  5- پیره‌وی نێوخۆ به‌ ئاڵوگۆر له‌ دارشتنی قه‌واره‌ی حیزب و چاوخشاندنه‌وه‌ به‌ سانترالیزمی دیموکراتیک دا، گۆنگره‌ دیاری ده‌کات.

  6- رێزدانان بۆ مافی تاکه‌کان و دانانی میکانیزمی وا که‌ تاکه‌کان بتوانن به‌ راستی خاوه‌ن نه‌زه‌ر و بۆچوونی خۆیان  به‌ دوور له‌ جیناح بازی بن.

  7- بایه‌خدان به‌ رۆڵی ژنان و لاوان له‌ ساختاری حیزب دا.

  8- بایه‌خدان به‌ شفافیه‌ت و ئازادی بیرورا.

 داوام له‌ دڵسۆزانی بزووتنه‌وه‌ی کورد و هه‌روه‌ها هه‌موو ئه‌و که‌سانه‌ که‌ هه‌ست به‌ به‌رپرسایه‌تیی له‌ ئاست ئه‌م مه‌سه‌له‌یه‌وه‌ ده‌که‌ن، ئه‌وه‌یه‌ نه‌هێڵن ئاواتی یه‌کپارچه‌یی دووباره‌ی حیزب بۆ هه‌تاهه‌تایه‌ له‌ گۆڕ بنرێ.

دڵنیام به‌ هه‌وڵ و تێکۆشانی ئه‌ندامان و لایه‌نگرانی ره‌نج دیتووی حیزب و دلسۆزانی گه‌له‌که‌مان جارێکی دیکه‌ حیزبی دیموکراتی کوردستانی ئێران ده‌توانێ هه‌موو تێکۆشه‌رانی رێگای ئازادی،  دیموکراسی و مافی نه‌ته‌واییه‌تی له‌ ژێر چه‌تری خۆیدا کۆ کاته‌وه. جارێکی دیکه‌ ده‌سته‌کان یه‌کتر بگرنه‌وه‌و دڵه‌کان له‌ ئاست یه‌کتر پاک بنه‌وه‌. بۆ به‌جێگه‌یاندنی ئه‌م ئه‌رکه‌ پیروزه‌ پێویسته‌:  

   1- هه‌ر که‌س له‌ ئاستی خوی و به‌ تایبه‌تی له‌ ئاستی رێبه‌ری و راگه‌یاندن دا کۆتایی به‌ پروپاگه‌نده‌ی دژی یه‌کتر بێنی و ده‌رکه‌ی دیالۆگ له‌ گه‌ل هاورێ پێشووه‌کانی خۆی بکاته‌وه‌.

  2- له‌ کۆبوونه‌وه‌ گشتییه‌کان، له‌ کۆبوونه‌وه‌ی چه‌ند که‌سی، له‌ کۆنفرانسه‌کان و له‌ هه‌ر شوێنێک که‌ بگونجێ باس له‌ یه‌کبوونه‌وه‌ی دووباره‌ی حیزب و دارشتنه‌وه‌ی قه‌واره‌ی نوێی حیزب بکه‌ن و له‌ به‌رپرسان داوا بکه‌ن ئه‌رکی مێژوویی سه‌رشانی خۆیان له‌و باره‌وه‌ به‌ جێ بگه‌یه‌نن.

 3-ئه‌و که‌سانه‌ که‌ ئاماده‌ن له‌و پرۆسه‌دا هاوده‌نگ و هاوهه‌نگاو بن، ناووناوبانگ(ئه‌وانه‌ی نێوخۆی وڵات له‌ ناوی خوازراو که‌ڵک وه‌رگرن )…ژماره‌ی تیلیفون… ئیمه‌یلی خۆیان… شوێنی نیشته‌جێ بوون (نێو خۆی ولات، باشووری کوردستان، ئوروپا و …) بۆ   ئه‌و   ئیمه‌یله‌hawdengy@yahoo.com  بنێرن و یان له‌ گه‌ل ئه‌و ژماره‌ تیلیفونانه‌ ته‌ماس بگرن:

 004632032164 و   0046736959061  

تێبینی: ئه‌و میکانیزمه‌ له‌ سه‌ره‌وه‌ پێشنیار کراوه‌، ره‌نگه‌ که‌م و کووڕی تێدا بێ و به‌ته‌واوی وڵامده‌ر نه‌بێ. ‌به‌ڵام ده‌توانێ ده‌سپێکێ بێ بۆ هه‌وڵی به‌رین له‌ پێناوی داڕشتنه‌وه‌ی قه‌واره‌ی حیزب به‌ جۆرێک که‌ هه‌موو تێکۆشه‌رانی ئه‌و رێگایه‌ له‌ یه‌ک سه‌نگه‌ردا خه‌باتی خۆیان رێکخه‌نه‌وه‌. ده‌کرێ به‌ پێکهێنانی کومیته‌یه‌ک له‌ که‌سایه‌تیه‌ به‌ناوبانگ، دڵسۆز و به‌ نفووزه‌کان و له‌ رێگای ئه‌وانه‌وه‌ ته‌ماس له‌گه‌ڵ هه‌ردوو لا، هه‌وڵه‌کان له‌ پێناو ئه‌و مه‌به‌سته‌دا له‌ سه‌ره‌‌وه‌وه‌ باس کرا به‌ ئامانج بگه‌یه‌ندرێ.  به‌و هیوایه‌.                                                              

به‌ ئاواتی یه‌کبوونه‌وه‌ی دووباره‌ی حیزبی دیموکراتی  کوردستانی ئێران

عه‌لی مێهرپه‌روه‌ر
31-03-2007/10-1-1386

‌ ‌ ‌‌